എന്‍റെ പരിചയപ്പെടുത്തല്‍

നമസ്ക്കാരം ..എന്‍റെ പേര് കുഞ്ഞാമി  .ജനിച്ച സമയവും തിയതിയും ഓര്‍മയില്ല .ഓര്‍ത്തെടുക്കാനും മിനക്കെടുന്നില്ല .കാരണം ഞങ്ങള്‍ പൂച്ചകള്‍ നിങ്ങളെപ്പോലെ മെഴുകുതിരി ഊതി കേക്ക് മുറിച്ചു ബര്‍ത്ത്ഡേ ആഘോഷിക്കാറില്ല . ഞാന്‍ ഒരു ഇത്തിരി കുഞ്ഞന്‍ കുറിഞ്ഞി പൂച്ചയാണ് .സഞ്ചാരപ്രിയ.വീടുകളില്‍ നിന്നും വീടുകളിലേക്ക് നീളുന്ന പ്രയാണം .ഞാന്‍ ഒരു സ്ഥലത്തും വലിഞ്ഞു കയറി ചെല്ലാറില്ല .വീട്ടുകാര്‍ക്ക് എന്‍റെ പാര്‍പ്പു ബുദ്ധിമുട്ടല്ല എന്ന് തോന്നിയാല്‍ മാത്രം ഞാന്‍ അവിടെ തങ്ങും .കൂടിയാല്‍ ഒരു 3 - 4 മാസം .അത് കഴിഞ്ഞാല്‍  എനിക്ക് ബോറടിക്കും .പിന്നെ അവിടെ നിന്നിറങ്ങും .ഈ വീടുകളില്‍ ഞാന്‍ കണ്ടതും കേട്ടതും ചേര്‍ത്ത് വച്ച് ഒരു ബ്ലോഗ്‌ എഴുതിയാലോ എന്ന് ചിന്തിച്ചു തുടങ്ങിയിട്ട് കുറെ നാളായി .ഇപ്പോഴാ സമയം കിട്ടിയത് .ഓരോ വീട്ടിലെയും കഥകള്‍ ..അവ പേറുന്ന രഹസ്യങ്ങള്‍ ,ചില തമാശകള്‍.. ഇതൊക്കെയാണ്എന്‍റെ ബ്ലോഗില്‍ .ഓരോ വീട്ടുകാരും എന്നെ പല പേരുകള്‍  ചൊല്ലി വിളിക്കാറുണ്ട്.എങ്കിലും ഞാന്‍ എന്നെ കുഞ്ഞാമി എന്നാണ് വിളിക്കുന്നത്‌ .അത് കൊണ്ട് തന്നെ  ഈ ബ്ലോഗ്‌ "കുഞ്ഞാമിയുടെ യാത്രകള്‍ " എന്ന് നാമകരണം ചെയ്യാന്‍ തീരുമാനിച്ചു .എല്ലാവര്‍ക്കും സ്വാഗതം " മ്യാവൂ "